لب المشكلة في مصر طوال ال3 سنين الماضية

لب المشكلة في مصر طوال ال3 سنين الماضية أن الطرف اللي بينتصر مش بينتصر علشان ذكائه أو علشان عنده مشروع حقيقي لإدارة الدولة، لأ بينتصر علشان غباء منافسيه، كل المشاريع اللي عند الكل بلا استثناء شوية شعارات بتنجانية متساويش نكلة في أي مناقشة جادة: الإسلام هو الحل، الوطنية المصرية و الحفاظ على الأمن القومي، الثورة مستمرة و تطهير المؤسسات هو الحل.

علشان كده سقط (مبارك) و (المجلس العسكري) و (الإخوان المسلمين)، و رأينا تحول واحد معتوه إلى أكثر مرشحين الرئاسة شعبية (أبوإسماعيل) في بر مصر و بحرها، و بعدها بأقل من سنة نفس الشخص اتزف و هو بيتم اعتقاله علشان نفس الجماهير بقت بتعبد شخص أخر برتبة جنرال.
و حاليا بنرى تحول مقدم برنامج كوميدي إلى بطل قومي و رمز للتيار الثالث اللي المفترض بيعارض العسكريين و الإسلاميين معا، و تقريبا هنخلينا كتير في المهلبية دي.

(باسم يوسف) ظل الوحيد من الشخصيات العامة المحافظ على شعبيته، و بتتزايد بمرور الوقت طول الفترة دي لسبب بسيط:
كم الغباء المتبعثر في كل مكان، و بالتالي عنده مادة خصبة لا تنتهي من الكوميديا السوداء لبرنامجه.

 و البلهلوان بقا بطل .. بس تصدق ، مفيش غيره من الشخصيات السياسية اللي ممكن تعمل الدور دا ، مصر مسرح لاشذ مشاهد التاريخ .  هو المفترض أنه مش شخصية سياسية، ده واحد وظيفته أنه يتريق على السلطة بغض النظر مين فيها، بس بالمنظر ده لو اتريق على (السيسي) و شوية الحمير اللي راحوا يتظاهروا و يقدموا بلاغات ضده الحلقة الجاية، هيتم تنصيبه بعدها زعيم الثورة في ميدان التحرير.

0 التعليقات:

إرسال تعليق

Twitter Delicious Facebook Digg Stumbleupon Favorites More