الفتي و الهري من عجائب الأمور في مصر

من عجائب الأمور في مصر، تلاقي واحد بمجرد معرفة تخصصك يسألك مثلا عن توقعك لمستقبل الأسواق المالية العالمية و سياسات البنك الفيدرالي الأميركي...الخ، و لما تقوله ببساطة شديدة " معرفش" تلاقيه بيتعامل معك باستنكار لأن عنده أحكام يقينية وزير الخزانة الأميركي نفسه ميقدرش يطرحها بهذه الثقة.

و ده غالبا نابع عن 3 أخطاء شائعة:

1- مفيش حاجة اسمها دارس اقتصاد أو فيزياء...الخ أكاديميا فبالتالي ممكن يفتي في كل ما يتعلق بالتخصص ده، ده اسمه بتنجان محشي.
احنا في عصر التفاصيل التقنية في كل مجال زادت بدرجة جعلت داخل كل علم عشرات الفروع: اقتصاديات التمويل، اقتصاديات الطاقة...الخ، الفيزيائي المتخصص مثلا في condensed matter physics ميقدرش يديك رأي متخصص غير في الفرع ده تحديدا، بينما في فرع elementary particle physics هيقولك رأيه باعتباره متابع مهتم عنده خلفية جيدة مش متخصص ملم بكل جوانب الموضوع.

2- في فرق عظيم بين الآراء الشخصية اللي بتتقال على القهوة أو بتكتبها على صفحتك على الfacebook، و بين الpeer reviewed journals.
لو في شخص عنده اضافة جديدة للمعرفة البشرية هتحل الأزمة المالية العالمية مثلا، أكيد مش هينزلها في صورة فيديو على الyoutube أو مقال على الblog بتاعه علشان يقرأها أناس غير متخصصين و غير مؤهلين للحكم عليها.

الطبيعي أنه هيكتبها في صورة ورقة علمية و يبعتها لجورنال أكاديمي لعله في يوم من الأيام يفوز بجائزة نوبل فى الاقتصاد مش تعليق (جهد مشكور و رائع أخي الحبيب).

3- فيما يتعلق بالاقتصاد تحديدا، و بخاصة اقتصاديات التمويل و الأسواق المالية، وهي أفشخ الطرق لكي تصبح مليارديرا.
لو أنا عندي معرفة شبه يقينية بنسبة 90% فقط لاغير عن مستقبل الأسواق المالية العالمية، أكيد مش هأقعد على الfacebook لتنوير البشرية.

انا هأبقى هناك في (وول ستريت) إمبراطور العالم بأعبي الدولارات في زكايب، و أتنقل برفقة الحسناوات بالبيكيني على شواطىء ميامي بعربية لامبورجيني أفينتادور، و بألف العالم بطائرة خاصة.

شوية common sense أيها القوم.

0 التعليقات:

إرسال تعليق

Twitter Delicious Facebook Digg Stumbleupon Favorites More