عادة قراءة الكتب

مفيش عادة طلعت منها بفايدة في حياتي كلها زي عادة قراءة الكتب، كنت بأحاول أقرأ كتاب كل 10 أيام و أكتب في ورقة ملخص ليه و الأفكار اللي خرجت بيها منه.
المصادر الأخرى للمعرفة زي المقالات، الوثائقيات...الخ مفيدة جدا طبعا، و خاصة في العصر السريع اللي احنا عايشين فيه و اللي مبيديش الواحد الفرصة لالتقاط أنفاسه.

لكن بكل تأكيد مفيش مصدر حقيقي للمعرفة زي قراءة كتاب تمت كتابته على ايد متخصص، و أنا هنا مش بأتكلم على كتب أكاديمية Text books اللي متهمش غير المتخصصين في مجال ما، لكن على الكتب اللي بتقوم بتبسيط قضايا مهمة و ظواهر معينة سواء في العلوم الطبيعية أو الاجتماعية أو التطبيقية أو الانسانيات على ايد متخصصين في نفس المجالات لمستوى القارىء العادي layman، و بيبقى فيها مساحة أكبر بمراحل تتيح للكاتب تقديم قضية متكاملة من كافة النواحي للقارىء.

معدل القراءة أساسا في (مصر) و العالم العربي منخفض بشكل مخيف مقارنة باللي بيعتمدوا على الراديو و التلفزيون في تحصيل معلوماتهم و تشكيل وعيهم، و الأنكى من كده أن تقريبا 70% من الكتب المنتشرة بتبقى إما كتب دينية بتتكلم عن عذاب القبر و فوائد الحجامة و الحجاب قبل الحساب، أو كتب عن خزعبلات التنمية البشرية و البرمجة اللغوية العصبية، و ال30% الباقيين روايات و دواوين أشعار، و كتب التهييس و الفرفشة بتاعة (أنيس منصور) و (محمد حسنين هيكل)...الخ.

مفيش كتب حقيقية بمعنى الكلمة، و ده طبعا نتيجة فقر الثقافة العربية و تخلفها عن العصر بمئات السنين، و حتى حركة الترجمة ضعيفة جدا ( باستثناء إسهامات ضئيلة جدا زي سلسلة عالم المعرفة، و المركز القومي للترجمة)، و بالتالي لو أنت عايز تقرأ كتب فيها إضافة فعلية لمعرفتك، مقدمكش حل غير إتقان الإنجليزية و هتلاقي قدامك كم من الكتب العظيمة اللي بتفتحلك آفاق لا حدود لها، لو وصلت بمعدل القراءة بتاعك لكتاب كل يوم، مش هتقدر تلم واحد على ألف منها.

0 التعليقات:

إرسال تعليق

Twitter Delicious Facebook Digg Stumbleupon Favorites More