كليب "سي_السيد" بتاع تامرحسني

أول مرة أسمع أغنية وأشوف كليب "سي السيد" بتاع تامر حسني كانت امبارح.

مبدأياً، عشان اللي مستعجل ومش فاضي يقرا كتير، رأيي فيها باختصار:

"مقززة."

اللي لسة عنده وقت يكمّل قراية.

فاكس الموسيقى ولا التوزيع ولا الرقص.. كله في حدود المعتاد، السادة، المُكَرَّر. لا جديد، لا إبداع، لا "فن".

الكلمات مجسدة حلم كل شاب ذكوري متسلط في مجتمعنا.

كلمات الأغنية والفيديو تعبير عن عقلية كل شاب مصدّف كدبة إن الراجل فوق الست بشكل أو بآخر.

فبينما تامر حسني بيغني إملاءاته على حبيبته اللي حابسها في أوضتها، هو في حمام سباحة بيشرب (غالباً فوّار) ويرقص مع دستة بنات و Snoop Dogg...

ده تجسيد لطبيعة كتير من الولاد في مجتمعنا (معلش، إحنا شباب زيّ بعض وفاهمين بعض):

الشاب يعُط وينام ويقوم ويقضيها جناين وكباري ومقطم وغيره وغيره، بعدين بكل فجاجة يرفع شعارات "اللي يلاقي بقرة تديله لبن ببلاش عمره ما يفكر يشتريها" و "لما اتجوز لازم تبقى واحدة ماعدّيتش على غيري"... وهكذا، جزء من الازدواجية اللي مجتمعنا موبوء بيها في أغلب مجالات حياتنا... نصطبح في الوقفة بس نصلي صلاة العيد ونسمّي واحنا بندبح، نستخدم صفة "رقاصة" كإهانة جارحة لأي بنت، بس أعلى أفلام تحقق مبيعات أفلام الرقص والرقاصات، وماننساش طبعاً "أنا وهبت نفسي لله يا ولاد الـ*****ـة"، وإلخ.

أنوثتها اللي بتضيع من عينك لما هي تقارن وتساوي بين الراجل والست دلالة على إن أنوثتها مبنية في عقليتك العتيقة على دونية المرأة قدام الراجل... دلالة على إن أول تعريف للمرأة في دماغك إنها أقل منك.

تصورك إن اللي انتَ تقوله هي تعمله وتمشي عليه وتلبسه و... و... مُتَوَقَّع من مجتمع بيصنّف الزوجة والبنات ضمن أملاك الراجل الخاصة.

أيوة ربما بعض البنات تحب لمسة تَمَلُّك أو دور "الفارس الحامي" من حبيبها، لأنه قد يكون تعبير منه عن غلاوتها عنده ورفضه إن حد\حاجة تحرمه منها. بس كلمات الأغنية دي تسلط وذكورية بشكل فج.

الأغنية دي طبعاً هاتاكل مع شرايح عريضة جداً من المستمعين (الفيديو عامل أكتر من 2 مليون مشاهدة في أسبوع [حتى الآن] على Youtube) لأنها ببساطة تعبير صريح وبسيط ودقيق عن عقلية أغلب ذكور مجتمعنا.

من الآخر، البنت زيّ الولد، من حقها تلبس زيّ ما تحب وتروح مكان ما تحب مع مين ما تحب وتعمل ما تحب، ماعليهاش موانع أو قيود غير اللي ع الولد.
خلّي قيمتك يا راجل في بيتك مبنية على احترام وتقدير وثقة متبادلين، من ند لند، بين عامودين متساويين لسقف واحد مش هايقف إلا بيهم سوا؛ ماتبنيش قيمتك في بيتك على خوف مراتك من يمين طلاق يشرّدها ويمرمطها ويهزأها قدام مجتمع أكتريته بتتعامل مع المرأة على إنها شر لا بد منه، بمنطق "نفسي فيه واقول إخيه"!

0 التعليقات:

إرسال تعليق

Twitter Delicious Facebook Digg Stumbleupon Favorites More