سيناريو متكرر جداً:
- أنا: اللي لابسه روح والكلام ده كلها أشكال للمرض النفسي، غالباً dissociative identity disorder وحتى بيسمّوها demonomania أو demonopathy، لأنها قايمة جوهرياً على اقتناع المريض إن اللي هو فيه ده مَس شيطاني.
- هو: انتَ مابتشوفش فيديوهات أبونا مكاري يونان وإزاي بيطرد الشياطين على اسم المسيح؟!
- أنا: لأ باشوف. بس باشوف برضو فيديوهات شيوخ بيطردوا جن بقراية قرآن.
- هو: يابني انتَ بتصدّق الكلام ده؟ ده نصب واحتيال!
- أنا: بس أبونا مكاري ده بحق وحقيقي؟
- هو: آه طبعاً.
- أنا: مش حاسس إنك عايز تقول اللي انتَ قلته ده تاني بس المرة دي تسمع نفسك وانتَ بتقوله؟
خلّينا موضوعيين يا حبايب...
يا إمّا هاتسلّم بحقيقة إخراج الشياطين، يبقى اللي بيطلّع بقرآن زي اللي بيطلّع بصليب زيّ اللي بيطلّع بضرب الشوم.
يا إما هاتسلّم بحقيقة إنه مرض نفسي زيه زيّ أي مرض نفسي، ولأن المُدخَل اللي كوّن المرض في المريض إنه "مَس شيطاني"، واتغرس في لا وعيه إنه مَس شيطاني، مِش هايخف غير لما لا وعيه يقتنع إن "الروح اللي عليه" طلع.
لو تاخد بالك إن أعراض "المس الشيطاني" في مجملها واحدة مابتتغيرش: تشنجات وريالة وعنف وإلخ مجموعة الأعراض المعروفة دي.
ماجربتش تسأل نفسك: هما الشياطين والجن محدودين أوي كده ليه؟
طيب ماشوفناش ليه واحد العفريت اللي لابسه خلاه يطير ولا يبخ نار؟
دوّر أكتر في حالة dissociative identity disorder هتلاقي إزاي إن "الملبوس" لما يفوق من الصرعة مابيفتكرش هو كان بيعمل إيه ولا إيه اللي حصل، وتغيرات الصوت وتعبيرات الوش وإلخ، كل ده مسجل وموثق كأعراض طبية للحالة إياها.
يعني، جرّب كده تقرا كلامي وتدوّر وراه.
يمكن اطلع صح وتبقى اتعلمت حاجة، أو أطلع غلط وتبقى اتأكدت من موقفك.
0 التعليقات:
إرسال تعليق