الحاجة الوحيدة اللي عايز أقولها قبل ما اسافر

أبوس إيديكم، مش كل ما كان عنده وجهات نظر غير تقليدية بخصوص الدين بقى اسمه ملحد!

مئات المرات آلاقي الناس بتستخدم "لا ديني" و "ملحد" على إنها مترادفة، أو على إنها نوعين من المعتقدات.

محاولة مني لنتف الهرتلة، هاقول للمرة السبعين معاني المصطلحات دي.

# اللادينية Irreligion
عنوان شامل لكل حالة تتضمن عدم اعتناق دين معين، أو تجاهل فكرة الدين، أو معاداة الدين (الأخيرة دي بالذات ليها عنوان فرعي لوحدها، ماعرفلوش ترجمة بالعربي: antireligion). العناوين الفرعية تحت العنوان الرئيسي ده كتيرة جداً، هاسيبها للي يحب يدوس فيها براحته، واكتفي بالتالي، لأن اللي جايين دول هما الموجودين في مجتمعنا حالياً، بينما التقسيمات الدقيقة التانية لسة بدري عليها لأن المجتمع اللاديني في بلدنا لسة بيحبي، ماوصلش للمستوى ده من التعقيد.

# الإلحاد Atheism
هو الاعتقاد بعدم وجود آلهة\إله. هو مذهب على العكس من التأليه theism، اللي يؤمن بوجود على الأقل إله واحد خالق ومُنَظّم للكون.

# الربوبية Deism
تيجي تحت عنوان "التأليه"، لكنها تختلف عن التأليه في إن الربوبية تؤمن إن خالق ومُنَظِّم الكون حطّ له قوانينه الطبيعية لكنه مش بيتدخل في مجريات أمور الحياة والكون، بينما التأليه بيؤمن بتدخل الله\الآلهة في العالم لحد لحظتنا دي؛ لتوضيح الفرق: من أنواع التأليه التوحيد monotheism، واللي بيشمل (مثلاً وليس حصراً) الديانات الإبراهيمية، والزرادشتية، والبهائية.

# Anti-theism (مالهاش في حدود علمي مصطلح بالعربي) "مكافحة التأليه"
يعني مش بس الاكتفاء بالإلحاد من حيث إنه تجاهل أو إنكار لوجود آلهة، بل الإيمان إن الاعتقاد بآلهة له أضراره على المجتمع والإنسانية، ونحارب ونستأصل الإيمان بالآلهة.

# اللاأدرية Agnosticism
الاعتقاد إن وجود الله وطبيعته وأصل الكون قضايا مافيش حاجة توصّل لإجابات قاطعة بخصوصها. اللاأدرية بتهتم جداً بالفرق والتمييز بين "الإيمان" و "المعرفة"، فقضايا الإله وما إلى ذلك هي موضوع "إيمان"، لكن مافيش "معرفة" قاطعة بخصوصها.

كل ده كوم، والليبرالية الدينية religious liberalism (صنف من الليبرالية قائم على ومحدد بالمبادئ الدينية) كوم تاني، واللاهوت الليبرالي liberal theology (توجه قايم على الترحيب بالقراءات الغير تقليدية للأديان، والتعايش والتداخل بين العقايد المختلفة، ونسبية القيم والأخلاق) كوم تالت خالص.

نفسي أرجع من السفر (كمان شهرين، للي هايسأل) آلاقي بقدرة قادر اللبس في المصطلحات دي خلص.

0 التعليقات:

إرسال تعليق

Twitter Delicious Facebook Digg Stumbleupon Favorites More