ايه الفرق بين الباكلوريوس و الليسانس؟

جالي السؤال ده في الـمدونة، فدوّرت على إجابته لقيتها معلومات ظريفة تستاهل تتقال:

"ايه الفرق بين الباكلوريوس و الليسانس؟ و ماتقوليش ده للكليات العلمية و ده للأدبية يعنى ايه الكلام ده نفسه؟"

بكاليريوس جاية من الكلمة الفرنساوي baccalauréat، اللي هي من اللاتيني bacca (يعني ثمرة أو حَب "berry") و laureus (إكليل من أفرع اللاورا "laurel bay" - هتلاقيها مجففة عند العطار لو عايزة تشوفيها). في عصر النهضة Renaissance في أوروبا كان اللي يخلّص دراسته من ضمن مراسم تكريمه إنهم يلبّسوه إكليل اللاورا ده، ومن العادة دي جه اشتقاق الكلمة، "baccalaureatus" "حامل إكليل اللاورا".

ليسانس اشتقاقها من الفرنساوي license (نفس الكلمة بالإنجليزي بس نطق مختلف)، يعني "ترخيص"، من اللاتيني licentia docendi = إذن أو "ترخيص" بالتعليم، أو licentia ad practicandum = ترخيص مزاولة المهنة.

 ماعنديش أي فكرة بصراحة ليه فرق التسمية دلوقتي، بس اللي أعرفه إن تاريخياً كان في فرق بين التصريح بالتعليم في الجامعة license، وبين اللي معاه شهادة bachelor أو master أو doctor. يعني اللي معاه دكتوراه مثلاً (أو أي شهادة عليا) كان لازم ياخد "ليسانس" رسمي عشان يبقى عضو هيئة تدريس.
حالياً مافيش فرق، والكلمتين بيعتبروا مترادفتين.

تاريخ الفرق بين الكلمتين وإزاي راح مع الوقت ممكن نلاقي له keywords ندوّر على أساسها في التفاصيل هنا:
http://en.wikipedia.org/wiki/Licentiate#History

اللي عنده إضافة أو تصحيح يا ريت يفيدنا.

0 التعليقات:

إرسال تعليق

Twitter Delicious Facebook Digg Stumbleupon Favorites More